Мѣсяца ноября въ 23 преставися великий князь Александръ Ярославичъ въ лѣте 6771.
Скажемъ мужество и житие его. О Господѣ нашемъ Исусе Христе Сыне Божия и язъ худый и грѣшный и недостойный начинаю писати житие великаго князя Александра Ярославичя, внука Всеволожа. Понеже слышахъ отъ отецъ своихъ и самовидецъ есмъ возрасту его и радъ быхъ и исповѣдалъ святое житие и честное и славное, но якожъ приточникъ рече, во злохитру душу не внидеть премудрость, на высокихъ бо краехъ есть, посреди же стезъ стояше, при вратехъ сильныхъ присѣдитъ. Аще и грубъ есми умомъ, молитвою Святыя Госпожи Богородицы и поспешенимъ святаго князя Александра Ярославичя начатъ положюсъ. Той бѣ князь Александръ Ярославичь Богомъ роженъ отъ отца благочестива и нищелюбца, паче жъ кротка, великаго князя Ярослава, отъ матери благочестивыя Феодосеи, якожъ рече Исаия пророкъ: "Тако глаголеть Господь, князи Язъ учиню, священни бо суть, Азъ ввожю, во истину, безъ Божиа бо повелѣниа не бѣ княжениа его". Но княжениа князя Александра Ярославичя Богомъ благословенно. Но возрастъ его паче инѣхъ человѣкъ, а гласъ его, яко труба въ народе, а лице его, яко лице Иосифа, иже бѣ поставилъ его егупетски царь втораго царя во Египте. Сила жъ бѣ ему часть бѣ от силы Самсоня, и премудрость бѣ ему Соломоня, далъ Богъ храброство же ему царя римскаго Еусписиана, сына Нерона царя, иже пленилъ есть землю Июдѣйскую. Иногда ополчився гражане Атупату хотя приступити, шедше гражане победиша полкъ его, и оста единъ и взя си градъ ихъ до вратъ градныхъ и посмѣяся дружинѣ своей и укори я укоромъ и рече: "Оставите мя единаго". Тако жъ князь Александръ Ярославичь побѣждаа непобѣдимъ. И се нѣкто отъ западныя страны, ижъ нарицаютца слуги Божиа, и отъ тѣхъ приидоша, хотя видѣти дивный возрастъ его, якожъ древле царица южская приходила къ Соломоню царю, хотя слышати премудрость его, яко сей, именемъ Андрѣйашь, видѣвъ князя Александра Ярославичя, и возвратися ко своимъ и рече: "Прошедъ страны и языки, не видѣхъ таковаго ни во цари царя, ни во князѣхъ князя". И се слышавъ краль части Римскиа, отъ полунощныя страны таковое мужество князя Александра Ярославичя и рече: "Пойду, попленю землю Александрову". И собра силу велику и наполни корабля многи полковъ своихъ и поиде въ силе велице, пыхая духомъ ратнымъ. И преиде реку Неву, шатаяся безумиемъ, посла послы разгордѣвся ко князю Александру Ярославичю въ Новъ городъ въ Великий и рече: "Аще можеши ми противитися, уже есмь здѣ, попленю землю твою". Князь же Александръ Ярославичь слышавъ словеса сихъ и разгорѣвся сердцемъ, вниде въ церковь святыя Софѣя и паде на колѣно предъ олтаремъ и нача молитися со слезами Богу и рече: "Боже хвалный и праведный, Богъ крѣпки и велики, Боже вѣчный и сотворивый небо и землю, море и реки, и постави прѣдѣлы языкомъ, и повелѣ жити, не преступая въ чюжая части земли". И возприимъ псаломьскую пѣснь и рече: "Суди, Господи, и разсуди прю мою, суди, Господи, обидящимъ мя и возбрани борющихся со мною, приими оружие и щитъ и стани въ помощь мнѣ".
И скончавъ молитву, воставъ, поклонися архиепископу. Архиепископъ же Спиридонъ благослови его и отпусти. Александръ же Ярославичь идя ис церкви, утирая слезы. И нача крепити дружину свою и рече: "Не въ силе Богъ, но въ правде. И помянемъ пѣсньсловца Давида: сии въ оружьия, сии на конехъ, мы жъ во имя Господа Бога нашего призовемъ, ти спяти быша и падоша". И поиде на ня въ мале дружинѣ, не сождавъся со многою силою своею, уповая на святую троицу. Жалостно слышати, яко отецъ его Ярославъ честный, великий, не бѣ вѣдалъ таковаго востаниа на сына своего милаго великаго князя Александра Ярославичя, ни оному бысть вѣсть послати ко отцу во градъ Киевъ, уже бѣша приближися ратнии, и мнози ноугородцы не совокупилися бяху, понежъ ускори князь велики пойти. И прииде на нихъ въ день возкресениа на память святыхъ отецъ 600 и 30 бывшаго собора въ Халкидоне и на память святаго Кирика и Улиты и святаго князя Владимера, крестившаго землю Рускую. Имѣяше жъ вѣру велику ко святымъ мученикомъ Борису и Глѣбу. Бѣ некто мужъ, старѣйшина земли Ижерской 2 именемъ Беглусичь; поручена жъ бысть ему стража утреничная морская, восприять же святое крещение и живяше посреди рода своего, погана суща, наречено бысть имя ему во святомъ крещении Филипъ. И живяше богоугодно, въ среду и въ пятокъ пребываше во алчьбѣ. И сподоби его Богъ видѣти видѣние страшно, скажемъ же силу ихъ вкратце. И увидѣ силу ратныхъ, идуще противъ князя Александра Ярославичя, да скажетъ ему силу варяжскую и станы ихъ. Стрегуще ему обоя пути, и пребысть всю нощь во бдѣнии, якожъ солнце восходи, и услышавъ шумъ страшенъ по морю, и видѣ насадъ единъ гребущь по морю, а посреди насада Борисъ и Глѣбъ, стояща во одежахъ червленахъ, быста руки своя держаща на рѣмехъ. И гребцы сѣдяху, аки мглою одѣни. И рече Борисъ Глѣбу: "Брате Глѣбе, вели грести, да поможемъ сроднику своему великому князю Александру Ярославичю". Видѣвше Пелгусиа таково видѣние и слыша гласъ таковъ отъ святую мученику, стояше трепетенъ. И отиде насадъ отъ очю его, и поиде скоро князь Александръ Ярославичь. Пелгусиа же видѣ его радостныма очима и повѣда великому князю единому видѣниа. Князь же рече ему: "Сего не повѣдай никому жъ". И подщався на нихъ наѣхати въ 6 часъ дни, и бысть сѣча великая надъ римляны, и изби множество бесчисленое отъ нихъ и самому королеви возложи печать на лицы острымъ своимъ копиемъ. Здѣ же въ полку в Олексанъдровѣ явишася 6 мужей храбрыхъ и силныхъ и мужествовавъ съ имъ крѣпко. Гаврило единъ, именемъ Алексичь. Сей наѣхавше на шняку видѣвъ королевичь мчащше подъ руце, вьзъѣхавъ по дозсьцѣ до самого короля, и по нейже досцѣ возхожаху, и востекоша предъ нимъ, и паки обращеся и свергоша его з доски и съ конемъ въ море, Божиею благодатию оттуду изыде невреженъ, и паки наѣхавъ, бися съ самимъ воеводою крѣпко среди полку.
Другий же новогородецъ, именемъ Збыславъ Якуновичь. Сей наѣхавъ многажды бьяшася единымъ топоркомъ, не имѣяша страха въ сердци своемъ, и паде нѣколико отъ топорка его. Подивишася князь Александръ Ярославичь силе его и храбрости его. Третий же Яковъ, родомъ полочянинъ, ловчей бысть у князя. Сей наѣхавъ на полкъ съ мечемъ и мужествовалъ и похвали его князь. Четвертый же новогородецъ, именемъ Миша. Сей пѣшт з дружиною своею погуби три корабли римлянъ. Пятый отъ молодыхъ его, именемъ Сава. Сей наѣхавъ шатеръ королевъ великий златоверхий и подсече столпъ шатерный. Полцы жъ великаго князя Александра Ярославичя видѣша падениа шатра, возрадовашася о падение шатра того. Шестый же отъ слугъ его, именемъ Ратмиръ. Сей бысть пѣшь, и оступиша его мнози, и отъ многихъ ранъ паде и скончася. Сии же вся слышавъ отъ господина своего князя Александра Ярославичя и отъ иныхъ же - въ то время обретошася въ той же сѣчи. Бысть же въ то время чюдо дивно, якоже во древняя дни при Езикѣи цари, егда прииде Сенахиримъ, асирийский царь, на Иерусалимъ, хотя пленити святый градъ Ерусолимъ, и внезапу изыйде ангилъ Господень и изби отъ полку асирийска 100 тысящь, 80 тысящь 600. И восташа заутро, и обретошася трупие мертва. Такожде и при побѣде и князя Александра Ярославичя, егда победи корабля, обонъ полъ реки Ижеры, идѣже не бѣ проходно полкомъ Александровымъ, здѣ же обретошася вся трупие мертва отъ арханьила Божия, и останокъ побеже, а трупие мертвых своихъ наметаша корабля и потопиша въ мори. Князь же Александръ Ярославичь возвратися съ побѣды, хваля Бога и славя своего Творца, Отца и Сына и Святаго Духа, и нынѣ и присно и во вѣки вѣкомъ. Аминь.
Во второе жъ лѣто по возвращение ис побѣды князя Александра Ярославичя прийдоша отъ западныя страны и возгради градъ 1 во отечествии Александрове. Великий жъ князь Александръ Ярославичь изыде на ня вскорѣ, изверже градъ изо основаниа, а самихъ избиша, иныхъ съ собою приведе, а иныхъ помилова и отпусти, бѣ бо милостивъ паче мѣры. По побѣде же Александрове, егда победи короля, въ третии жъ годъ, въ зимнее время, пойде на землю Немецкую съ силе велице, да не хвалятся, рекуще: "Укоримъ словенский языкъ". Уже бо взятъ градъ Псковъ, и тиуни у нихъ посажени. Тѣхъ же князь великий Александръ Ярославичь изима и градъ Псковъ свобода отъ плѣна, и землю ихъ повоева и позже и полона взя безъ числа, иныхъ посече, а инии во градѣ совокупишаяся и рѣша: "Победимъ князя Александра Ярославичя и имемъ его рукама". Егда приближишася ратнии, и почюша стражи великаго князя Александра Ярославичя. Князь же Александръ ополчився пойде противу ратнымъ, и наступиша море Чюдское. Бысть же обоихъ множество. Отецъ же его Ярославъ послалъ бѣ ему на помощь брата меншаго князя Анъдрѣя во множе дружинѣ. Тако и у князя Александра множество храбрыхъ мужъ, якожъ древле у царя Давида, крѣпцыи, сильнии, тако жъ и мужи Александровы исполнишася духа ратна: бяху сердца ихъ, аки лвомъ, и рекоша: "О княже нашь честный, драгий, нынѣ приспѣ время намъ положити главы своя за тя". Князь же Александръ Ярославичь воздѣвъ руцѣ на небо и рече: "Суди, Господи, и разсуди прю мою, отъ языка велерѣчива избави мя, помози ми, Господи, якоже Моисѣю на Амалика древле и прадеду моему Ярославу на акаянного Святополка". Бѣ же тогда день суботный, восходящу солнце, сступишася обои, и бысть сѣча зла и трускъ отъ копей и ломление и звукъ отъ мечнаго сечениа, якожь морю мерзшу двигнутися; не бѣ видѣти леду, покрылося бяше кровию. Се же слышавъ отъ самовидца, рече: видѣхомъ полкъ Божий на воздусе, пришедши на помощь Александру Ярославичю. И побѣди я помощью Божиею, и въдаша ратнии плещи своа. Они же сѣчахуть и гонящи, яко по яйеру, не бѣ имъ камо убѣжати. Здѣ же Богъ прослави великаго князя Александра Ярославичя предъ всѣми полки, яко Исуса Навгина во Ерихоне. А ижъ рекъ: "Имамъ рукама великаго князя Александра Ярославичя", сего дастъ ему Богъ въ руцѣ его. И не обретеся никто жъ, противяся ему во брани. И возвратився князь Александръ Ярославичь съ победы съ славою великою. Бысть много множество полону въ полку его, ведяху подлѣ коний, ижъ именуетца рыдели.
Егда прииде князь Александръ Ярославичь ко граду Пскову, и сретоша его со кресты игумены и попове въ ризахъ, народъ многъ предъ градомъ, подавающе хвалу Богови, поюще пѣснь и славу государю, великому князю Александру Ярославичю: "Пособивый, Господи, кроткому Давиду победити иноплеменники и вѣрному князю нашему Александру оружиемъ крестнымъ свободити градъ Псковъ отъ иноязычныхъ рукою Александровою". О невѣгласи плесковичи, аще забудете князя Александра и мужи новгородцовъ и до правнучатъ Александровыхъ, уподобитеся жыдовомъ, ихъ же Господь препитѣ въ пустыни манною и крастельми печеными, сихъ всѣхъ забыша Бога своего, изведшаго ихъ отъ работы изъ Египта. И начаша слышати имя великаго князя Александра Ярославичя по всѣмъ странамъ и до моря Египетского и до горъ Аравитскихъ обону страну Варяжьскаго и до Рима.
Въ то время умножися языкъ литовьски, и начаша пакостити во области Александровы. Ездя нача избивати. Единою жъ случися ему выехати и поби 7 полковъ ратныхъ и множество князей и воеводъ изби, овии рукама изима; слугы же его, ругающеся, вязаху я къ хвостомъ коний своихъ.
И начаша боятися имени его. Въста въ то время нѣкто царь силенъ на восточной странѣ, и покори ему Богъ многи языки и отъ востока и до запада. Той же слышавъ князя Александра Ярославичя храбра и славна, и посла къ нему послы рекуще: "Александро, веси ли, Богъ покори мнѣ многия языки, ты ли единъ не хощеши покоритися силе моей, но аще хощеши съблюсти землю свою, то скоро прииде ко мнѣ и узриши честь царьства моего". Князь же Александръ Ярославичь, по умертвии отца своего, прииде въ Володимеръ въ силе велице, и бысть грозенъ приѣздъ его. Проиде вѣсть до усть Волги, и начаша жены моявидскиа полошати дѣти своя, рекуще: "ѣдетъ князь Александръ Ярославичь". Здумавъ же великий князь Александръ Ярославичь, и благослови его Кирилъ епискупъ, поиде къ цареви. И видѣвь его царь Батый и подивися и рече велможамъ своимъ: "Во истину ми повѣдаша, нѣсть, подобна ему князя во отечествии его". И отпусти его съ великою честью.
Потомъ же царь Батый разгнѣвася на брата его на меншаго, на князя Ондрѣя, и посла на него воеводу своего Невруя, и повоева землю Суждальскую. По пленении жъ Невруеви князь велики Александръ Ярославичь церькви воздвигнувъ и градъ исполнивъ и люди разпуженныя собра въ домы своя. О таковыхъ Исайя пророкъ рече: "Князь благъ во странахъ тѣхъ, увѣтливъ, кротокъ, смиренъ, по образу Божию есть, не избираеть богатества, не зря кровѣ праведничи, сиротѣ и вдовице въ правду судя, милостийлюбецъ, благъ домочадцомъ своимъ и внешнимъ странамъ, сиротамъ кормитель, богомоленъ, ангеломъ любителю, человѣкомъ щедрѣ ущедряетъ, показуетъ на мире милость свою. Распространи Богъ землю его богатествомъ и славою и должи Богъ лѣто его".
Иногда же приидоша послы отъ папы изъ великаго Рима, глагола князю Александру Ярославичю: "Папа рече, слышахомъ тя князя честна и дивна, и земля твоя славна и велика. Сего ради послахъ къ тебѣ отъ 12 кардилуану двѣ хитрѣйшаа - Гаадада и Гемондада, послушавши учения ею о законѣ Божий". Великий жъ князь Александръ Ярославичь здума съ хитрецы своими и восписа къ нему, рекъ: "Отъ Адама до потопа и до разделения языкъ и до начала Аврама, отъ Авраама и до произытиа Иизраиля сквозѣ Чермное море, отъ исхода сыновъ Иизраилевъ до умертвия Давида царя, отъ начала царства Соломаня до Августа и до рожества Христова, до страсти и воскресениа, отъ воскресениа и на небеса вшествия и до царьства Констянтина новаго, до перваго собора и до седьмаго, си вся добре свѣдаемъ, а отъ васъ учения не приимаемъ". Они же возвратишася восвояси.
Великому жъ князю Александру Ярославичю умножися дни житиа его. Бѣ иерѣилюбецъ и мнихолюбецъ, митрополита жь епископы чтяше аки самого творца. Бѣ бо тогда нужда велика отъ поганыхъ веляху людемъ съ собою воинствовати. Великий же князь Александръ Ярославичь пойде къ цареви, дабы отмолилъ люди оть бѣды, а брата своего меншаго Ярослава и сына своего Дмитрея посла съ новогородцы на западный страны и вся полки свои съ ними отпусти. Пойде жъ Ярославъ съ сыновцемъ своимъ въ силе велице и плениша градъ Юрьевъ Немецкий и возвратишася восвояси со многимъ полономъ и съ великою честью. Великий жъ князь Александръ Ярославичь взыйде отъ иноплеменникъ до Нова города до Нижнего и ту пребы дни мало здравъ, дошедъ Городца и разболѣся. О горе тебѣ, бѣдный человѣче, како можеши написати кончину господина своего, како не испадета ти зѣницу со слезами вкупѣ! Како ли не разседеся сердце отъ горкиа тугы! Отца бо человѣкъ можетъ забыти, а добраго государя не можетъ забыти, аще бы живъ съ нимъ во гробѣ влѣзлъ.
Великий же князь Александръ Ярославичь ревновавъ по Господѣ Бозѣ своемъ крѣпко, оставя земное царьство и желая небеснаго царьствиа, возприять ангилский образъ мнишескаго житиа; аще сподоби его Богъ больший чинъ восприяти - скиму. Тако Господеви духъ предастъ съ миромъ, скончася мѣсяца ноября въ 14 день на память святаго апостола Филиппа. Митрополитъ Кирилъъ 1 глаголетъ къ людемъ: "Чада моя, разумѣйте, яко уже зайде солнце земли Суждальскыа". Игумени жъ и попове и дьяконе, черноризцы, богатии и нищи и вси людие мнози вопияху, глаголюще: "Уже погибаемъ". Святое же тѣло его понесоша къ Володимерю. Митрополитъ же съ чиномъ вкупе церьковнымъ, князи и бояре и весь народъ, мали и велицы, сретоша его въ Боголюбове со свещами и съ кадилы. Народъ же отъ множества угнетахуся, хотяще приступити честнѣмъ одрѣ тѣла его. Бысть же плачь великъ зело и кричание много, яко николи же тако, но токмо яко земли потрястися. Бысть же тогда чюдо дивно, памяти достойно. По скончании святыя службы надъ честнымъ тѣломъ его приступи Кирилъ Митрополитъ, хотя разнути руку его, вложити грамоту духовную. Он же самъ, яко живъ, распростре руку и приятъ грамоту отъ руки митрополита. И бысть страхъ и ужасть велика зело на всѣхъ. И положено бысть честное тѣло его въ Рожествѣ Святей Богородицы, мѣсяца ноября въ 23 день, на память святаго Анфилофѣя епископа, со псалмы и пѣсньми, славяще Отца и Сына и Святаго Духа, Святую Троицу, нынѣ и присно и въ вѣки вѣкомъ.
Аминь.
Житие Александра Невского / Древняя русская литература. Хрестоматия. Сост. Н.И.Прокофьев. - М., 1980. - С.118-123.]